20-ամյա Սամվել Ավետիսյանին ընդամենը անվասայլակ է պետք: Մեկ տարուց ավելի այս տղան վեր չի կենում իր անկողնուց: Հիվանդությունը սկիզբ է առել զորամասից: Ինչպես ինքն է ասում, ծառայության ընթացքում իրեն ամրակցված հրազենով անզգուշաբար վնասվածք է ստացել պարանոցի հատվածում: Ծայրահեղ ծանր վիճակում նախ տեղափոխվել է Վարդենիսի զինվորական հոսպիտալ, այնուհետեւ Երեւանի Մուրացանի հոսպիտալ: Այստեղ Սամվելն 9 ամիս գտնվել է վերակենդանացման բաժանմունքում, որից հետո բուժումը շարունակել է Կարմիր Խաչի վերականգնողական կենտրոնում: Երկու բժշկական հիմնարկներում էլ Սամվելն ստացել է անհրաժեշտ բուժօգնությունը եւ իր շնորհակալությունն է հայտնում հոսպիտալի ու Կարմիր Խաչի բուժանձնակազմին, որոնց շնորհիվ ինքը դուրս է եկել մահվան ճիրաններից: Մասնավորապես Կարմիր Խաչում բուժման երեք ամիսների ընթացքում նկատվել են դրական միտումներ: Այսօր սակայն Սամվելի վիճակն այնպիսին է, որ նա գամված է անկողնուն: Գտնվում է տատիկի խնամքի տակ: Ինքը չի ուզում միլիոնավոր դոլարների բուժում, ինքը չի ուզում, որպեսզի հանգանակություններ արվեն համերգների տեսքով, նրան անվասայլակ է պետք, որպեսզի տնից դուրս գա ու աշխարհը տեսնի այնպիսին, ինչպիսին հիշում է: Իր հաշմանդամության համար Սամվելն ստանում է 18 հազար դրամ թոշակ, տատիկը՝ 36 հազար: Իսկ 54 հազար դրամը նույնիսկ դեղերին չի հերիքում: 

Սամվելը իր facebook էջում գրել է, մեջբերում եմ` 

Բարև Ձեզ, 

ես Սամվել Ավետիսյանն եմ և ունեմ առողջական լուրջ խնդիրներ։ Պառկած եմ տան պայմաններում, անշարժ և ոտքերս ընդհանրապես չեն գործում։ Ձեռքերիս վիճակը նույնպես գնալով վատանում է՝ աջ ձեռքս արդեն դժվարությամբ եմ շարժում։ Այս ամենը բանակում դժբախտ դեպքի հետևանք է։
Խնդրում եմ Ձեր օգնությունը և աջակցությունը, որպեսզի հաղթահարեմ իմ հիվանդությունը․․․

Շնորհակալություն ուշադրության համար, 
Սամվել։
+374 98503225